Тропарь, гл. 5

Образе кротости и милосердия явился еси,/ в бедах скорый помощниче и наставниче людей богомудрый,/ священномучениче Александре,/ веры ради пострадал еси даже до крове,/ темже душу уготовал еси в жертву Богу чистую,/ пролей ныне теплыя молитвы твоя ко Господу,/ да сохранит Отечество наше в мире и благоденствии// и спасет души наша.

Кондак

Восхвалим, верни, изрядно во священномученицех и славного в мученицех Александра, православия поборника и благочестия ревнителя, земли Русския красное прозябение, иже страданием Небесе достиже и тамо тепле молит Христа Бога спастися душам нашим.

Величание

Величаем тя, священномучениче Александре, и чтим честныя страдания твоя, яже за Христа во утверждение на Руси Православия претерпел еси.

Молитва

О, избранниче и угодниче Христов, священномучениче Александре, Церкве Русския столпе непоколебимый, земли нашея благое прозябение и красный плод, сродников твоих предстателю и наставниче! Ты во время гонения безбожнаго от сокровищницы души твоея спасительное исповедание православной веры изнесл еси, и людем верным пастырь добрый явился еси. Душу твою за Христа и Его овцы полагая и лютыя волки далече отгоняя. Ныне убо призри на нас, недостойных чад твоих, умиленною душею и сокрушенным сердцем тя призывающих. Умоли Господа Бога, да простит согрешения наша и избавит от адовых уз и вечного мучения. Утверди нас в вере святой, научи нас всегда творити волю Божию и хранити заповеди церковныя. Буди пастырем нашим — правило веры; воином — вождь духовный; болящим — врач изрядный; печальным — утешитель; гонимым — заступник; юным — наставник, всем же благосердый отец и теплый молитвенник. Яко да молитвами твоими соблюдеся в Православии Святая Русь и непрестанно славится в ней имя Пресвятой Троицы, Отца и Сына и Святаго Духа во веки веков. Аминь.